منتجات أرجع أشتريها أو لا الجزء الثاني

السلام عليكم .. كيفكم صبايــا إن شاء الله تمام اليــوم راح نكمل للموضوع اللي فات "مشتريات أرجع أشتريها أم لا؟

رآح نبدأ بأول مجموعة الفاونديشن "كريم الأساس" أنا بشرتي دهنية ولونها من متوسط لفاتح ...

أول فاونديشن من ماك studio moisture tint spf 15 الفاونديشن خفييف ومررة حلو يعطي نضارة ولمعة حلوة هو جدا خفيف مائي .. مايضر البشرة زي أي كريم ثاني أنا أستخدمو في الأيام اللي تكون بشرتي كويسة بدون حبوب أو شي .. واللي عندها آثار محينفعها آبداا.. محأرجع أشتريه لأن الحماية تعتبر خفيفة جداا وغير كذا أنا بشرتي فيها عيوب بما إنها دهنية.. بس ينفع تستخدمينو إذا بتغطي العيوب قبلها بكونسر او كوركتر أنا أغطيها بعجلة كريولان بطططلة.. بيبي كريم من غارنييه.. الدرجة لايت..جداا فاتح عليا أنا أستخدمو مع الفاونديشن ثاني يكون غامق وأفتحو فققط.. فاللي عندها فاونديشن غامق تفتحو ب غارنييه لايت .. وسعروو جداا مناسب .. محأرجع أشتريه لأن عندي لو بديل كونسلر فاتح فجالسة أستخدمو.. ثالث فاونديشن من بنفت بطللل حبيتو من قلبي ولا ضرر لي بشرتي أبداا تغطيتو متوسطة محأرجع أشتريه لأن حابة أجرب شي جديد..

أول شي وأبطل إختراع فكس بلس من ماك ... رااااائع أستخدمو لأكثر من شي .. مع البيوتي بلندر .. قبل المكياج.. بعد المكياج.. رااائع ..لمن خلص استبدلتو بسماش بكس photo finish primer water مرررة ماحبيتو ولا على قد المدح اللي جاه من الفاشونيستات.. ماصرت أصدق كلامهم.. فكس بلس أفضل بكثيييير.. حأرجع أخذ منو ثاني بس يخلص اللي عندي من سماش بكس.. ثاني شي برايمر من فورايفر المصحح يعطي نظارة للبشرة وحلو أنا حبيتو .. محأرجع أشتريه لأن عندي منو كريمي زي الكونسر تجي بعلبة مع مجموعة ألوان مصححات ثانية.. بيبي كريم من بودي شوب مررررة مايغطي ولا يسوي شي ينفع فقط للي بشرتها جداا صافية مافيها ولا عيب تحطو عالبشرة يعطي قلو وإضاءة جميييلة ... محأرجع أشتريه لأن حلاقي بدائل غيرو بلون وإضاءة.. برايمر من بودي شوب لتغطية المسامات وامتلائهاا... حسيت حق بنفت أفضل .. بس الشي الحلو اللي فيه شعور النعناع والشاي الأخضر حلو .. تحسي بنظافة.. طريقتو تحطيه على المسامات وتنتظري من ٣ إلى ٥ دقايق . وتحطي المكيااج..

معطرات للغرفة والمفارش من باث آند بودي ووركس.. الأول باللآفندر والفانيلا.. ريحة الفانيلا طاغية أكثر من اللافندر .. ريحتو حالية شوي .. فالبداية حبيتو بس بعدين حسيت الريحة قوية .. بالذات لمن تستخدميه في مكان ضيف وصغير.. الأفضل إستخدامو في مكان واسع وشرح. الشي اللي مميز فيه ان الكمية اللي فيه تقعد معك فترة طويلة... محأرجع أشتريه .. لأن ريحتو ثقيلة ونا ماأحب الروايح اللي فيها سويت .. الثاني ريحتو بالضبط فنااادق ريحتو مرررة حلوة لو تشميها راح تحسي باسترخاء ونظافة.. حأرجع أشتريه لو في الحجم الأكبر يكون أفضل

أول شي قلم حواجب ينبرم من أنستازيا ..... أفضل شي جربتو للحواجب أمانة.. اللون اللي أستخدمو براون.. يعطيكي منظر طبيعي للحواجب كأنك مو مستخدمة شي .. عيبو انو يخلص بسرعة ولازمم تنتبهي عليه لاينكسر معك .. أنا حاليا بجرب تبع بودي شوب ومرتاحة عليه .. يمشي الحال هههههه. بجرب قلم حواجب جديد من فورايفر نفس فكرة أنستازيا..وبقارن بينهم وبشوف بعدها أستقر على أيت منتج.. كونسلر من مايبلين تغطيتو تعتبر ثقيلة نوعا ما .. اسم الدرجة classic beige 030 صراحة حلو مرررة أنا أستخدمو لأستخدامين .. اضاءة لبعد مااحط الكونسر ... و أفتح فيه الفاونديشن اذ كان غامق... محأرجع أشتريه .. لأن نزل منتج جديد من بودي شوب للفاونديشن.. قطرات تحطيها مع كريم الأساس تفتح وتغمق الكريم..

منتجات للشعر ...

الأول رغوة من ويلا لتجعيد الشعر وتموج الشعر ... جداااا ثقيلة ويبغالها استخدام صحيح لأن بتعدم الشعر وتظطري تغسليه من جديد .. ماحأرجع أشتريه لأنها .. ثقيلة جداا وتنشف الشعر..

ثاني شي رغوة تحمي شعرك من السشوار أو الفير تستخدميها قبل ماتبدئي تعملي شعرك .. حبيتها بس الأفضل منها بخاخ تريز مي .. لأنو سائل .. وهيا رغوة .. مااأحب احساس الرغوة أبداا.

المنتج الثالث من شركة أورقانكس .. كريم تنعيم بزيت الأرقان المغربي .. يحمي الشعر من الأضرار وحرارة السشوار.. ماحسيت بأي فائدة صراحة ..ماحبيتو ..،محأرجع أشتريه...

المنتج الرابع ..كريم غارنييه فروكتيس ب ٣ زيوت معالجة للشعر .. زيت الزيتون..زيت الأفوكادو .. زبدة الشيا..

ينعم الشعر صراحة .. احطو على شعري وهو مبلول .. عيبو إن التنعيم مؤقت بعد الغسل يرجع الشعر مثل أول ..

محأرجع أشتريه لأن أحتاج شي يكون دايم ويعطي نتائج مو مؤقت فقطط.. بس اللي حابة تاخذ منو أنصحها كويس ..

آخر شي .. من لوريال بخاخ ينحط عالجذور .. يمنع تساقط الشعر.. يتكون من أرجنين وبروتين..

أنا ماحبيتو يعدم الشعر "يوصخو كأن الجذور مو نظيفة" أختي إستخدمتو يوميا لمدة وطلع لها بيبي هير تحطيه على شعرك عالجذور وهوا نظيف وتسوي مسااج.. بس لو قعدتي فيه لأكثر من يوم ماغسلتي شعرك يزيت ويتبهذل والفروة تحكك.

لازم يوميا تحطيه عالشعر إذا إنت من الناس اللي يوميا تغسل شعرها ينفع لك ..

محأرجع أشتريه.

منتجات منوعة ...

الأول مرطب من بالمرز يرطب الفم .. بس مؤقت ماأحس أنو يعالج .. فازلين أفضل ..محأرجع أشتريه..

ثاني شي سائل مضمضة للفم "closys".. أفضل نووع لحد الآن جربتو ينظف الفم ويحررق .. أحس فمي نظيف وأسناني أنظف.. حأرجع آشتريه .. تلاقوه بأي صيدلية..

ثالث شي مرطب العين من كلينك صراحة ماحسيت بأي شي .. مافي أي نتائج والكمية قلييلة .. ماتطول معك ..محأرجع أشتريه..

رابع شي .. مرطب للعين من بنفت ترطيبو مرررة حلو .. أستخدمو قبل المكياج لمنطقة العين بططل لايخطط ولا يكتل لك الكونسلر .. صراحة أنا أستخدمو فقط قبل المكياج مااأعرف إذا يعالج أو لا ..

ممكن أرجع أشتريهه.. إذا قريت عنو وحسيت لو فوائد أكثر من الترطيب ..

خامس منتج..جل مرطب للوجه من كلينك .. للي بشرتها دهنية لاتستخدم كريم تستخدم جل يكون أخف من الكريم.. الكريم ينفع للي بشرتها جافةة. الجل للي بشرتها دهنية.. حلو صراحة عمل توازن للبشرة . مايخليها تزيت أو تلمع.. حاليا أنا بجرب منتجات جديدةة. وبحكم عليها..

سادس منتج.. كريم مرطب للعين من كلارنس .. صراحة أفضل من كلينك.. حسيت في تغيير بهالاتي وخفت. عن أول..

حاليا جالسة أجرب منتج جديد.. أحب التغيير..

وللأمانة على كثر ماجربت منتجات للعين لحد الآن مالقيت منتج يبرد القلب ويكون بيرفكت..

وآخر شي منتج عينة جتني هدية من مندوبة أجربو من شركة skin&co هو عبارة عن مرطب يحمي من علامات تقدم البشرة حبيت ترطييبو مررة عجبني يخلي الوجه مخملي.. ونااعم .. حأرجع آخذ منو حجم كبير وأجربو أكثرر...

آخر مجموعة كريمات لليد والبشرة ..

أول منتج ...كريم يد من سوب آند قلوري لليد..لقيت مدح عليه عالي جداا. حسيتو زي أي كريم لليد مافيه ميزةة. محأرجع أشتريه..

ثاني منتج.. كريم لليد بالشيا كاشمير من باث آند بودي .. بطلل يرطب من قلب .. أحس يديني تتغذى صح.. عيبو ريحة الشيا كوب كيك وحلوياات .. أحس حلو للأطفال .. حيعجبهم ويحمسهم يحطو كريم لليد.. محأرجع أشتريه بسسب الريحة القوية كأني فمحل حلوياات..

ثالث منتج.. لوشن توايلايت من باث آند بودي .. ريحتو حلوة وفواحة ويرطب وكل شي حتى يطول عندك كميتو كبيرة .. أنا عندي المجموعة كاملة .. محأرجع أشتريه لأن أنا من الناس الللي تمل من الروايح لازم شي جديد.. حآبة أجرب مجموعة

مون لايت بودرية وتحسسك بنظافة ...

آخر شي كريم لليد من فيكتوريا سيكرت .. يرطب ترطيب متوسط بس ريحتو خفيفة ماتبان تختفي من اول ٥ دقايق..

محأرجع أشتريه لأن مالقيت شي مميز فيه..

انتهى البوست .. يارب يكون أعجبكم الموضوع وآسفة على طــول الموضووع..

ونشوفــكم ببوســت ثاني ..

#PART2